------------------------
കുടിച്ച ലഹരിക്ക്
മീതെ ടക്കീല പറഞ്ഞപ്പോള്‍
ഷക്കീലയെ കുറിച്ചോര്‍ത്തു
രേശ്മയെ ഓര്‍ത്തു
ചെറുനാരങ്ങാക്കീറ്
ഗ്ലാസ്സിന്റെ വക്കിലെ
ഉപ്പ് ചേര്‍ത്ത് നുണഞ്ഞ്
കണ്ണ് ചുളിച്ചപ്പോള്‍
അടുത്തിരുന്ന
ഇറാന്‍കാരി
നോക്കി ചിരിച്ചു.
ഷക്കീലേ,
പോരുന്നോടീ ന്ന്
മലയാളത്തില്‍ ചോദിച്ചപാടെ
കൈ പിടിച്ച് കൂടെ പോന്നത്
എങ്ങനെ വിവര്‍ത്തനം ചെയ്താലും
ചില അര്‍ത്ഥങ്ങള്‍
എല്ലാ ഭാഷയിലും
ഒന്നായത് കൊണ്ട് തന്നെയാവണം.
നമുക്ക് ഇറാനില്‍ നിന്ന്
ഇന്ത്യയിലേക്ക്
വാതക ക്കുഴലിടാമെന്ന്
ടാക്സിയില്‍ വെച്ച് പറഞ്ഞപ്പോള്‍
പാക്കിസ്ഥാനി ഡ്രൈവര്‍
കേള്‍ക്കണ്ടായെന്ന്
അവള്‍ കുണുങ്ങിച്ചിരിച്ചു.
ഡോളറില്‍ കരാറുറപ്പിച്ചത്
ആദ്യമേ വാങ്ങി
ബാഗിലിട്ടവള്‍
തയ്യാറായപ്പോള്‍
നജാദിനെ, നജാദിന്റെ
കുറ്റിത്താടിയെ ഓര്‍മ്മ വന്നു
മുറിയാകെ പരക്കുന്ന
വാതക മണം
തള്ളിമാറ്റി എഴുന്നേറ്റപ്പോള്‍
ചോദ്യം നിറഞ്ഞ മുഖം
തിരിഞ്ഞ് നോക്കാതെ പറഞ്ഞു
നീ പൊയ്ക്കൊ,
വാതക പൈപ്പ് ലൈന്‍
കരാറില്‍ നിന്നും
ഇന്ത്യ പിന്‍ വാങ്ങുന്നു
അത്ര തന്നെ.
അമേരിക്കക്ക് ഈ കരാര്‍
ഇഷ്ടമല്ലെന്ന്.
---------------------------
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ